काबुल– अफगानिस्तानमा दुई अमेरिकी सैनिकको ज्यान गएको छ । अफगानिस्तानमा उत्तर एटलाण्टिक सन्धी संगठन नेटोसँग आबद्ध दुई अमेरिकी सैनिक मारिएका हुन् ।

अमेरिका र तालिबान लडाकूबीच नयाँ वार्ता गर्ने तयारी भइरहेका बेला अफगानिस्तानमा अमेरिकी सैनिकको हताहती भएको हो । तालिबानले अमेरिकी सैनिकविरुद्ध आक्रमण गर्दै आएपनि पछिल्लो आक्रमणको कुनै पनि समूहले जिम्मा लिएको छैन ।

अमेरिकी विदेशमन्त्री माइक पम्पेओले अफगानिस्तानको भ्रमण गरेको २४ घण्टा नबित्दै अफगानिस्तानमा दुई अमेरिकी सैनिक मारिएका हुन् ।
अमेरिकाको इतिहासमा नै लामो युद्धको रुपमा रहेको ‘अफगान युद्ध’ अन्त्यको लागि गत सेप्टेम्बरमा पनि अमेरिकाले तालिबान लडाकू समूहलाई वार्तामा ल्याउने कोशिसले गरेको थियो ।

अफगानिस्तानमा युद्धरत तालिबान लडाकू समूह र अमेरिकाबीच आगामी जुन २९ मा कतारको राजधानी दोहामा हुने कार्यक्रम छ ।

अफगानिस्तानमा अझै १४ हजार अमेरिकी सैनिक तैनाथ रहेका छन् । ती सैनिकहरु अफगान फौजलाई तालिम र सल्लाहका लागि तैनाथ गरिएको बताइन्छ । अफगानिस्तानमा सन् २०१४ को अन्त्यसम्म करिब एक लाख नेटोआवद्ध अमेरिकी सेना रहेका थिए ।

ती सैनिकहरु सन् २०१४ को अन्त्यमा अफगान युद्ध सकिएको घोषणा गर्दै आफ्नो देश फर्किएपछि त्यहा करिब १४ हजार नेटोआवद्ध अमेरिकी सैनिक मात्र बाँकी रहेका छन् ।