काठमाडाैं– नेपाली किसानको उखुले बजारै पाएको छैन । उद्योगीले दिनुपर्ने रकम पनि किसानलाई दिएकै छैनन् । यस्तो बेला सकारले भारतीय उखु आयात गर्न पाउने गरी किसानमारा निर्णय गरेको समाचार आजको अन्नपूर्ण दैनिकले ‘उखुमा किसानमारा निर्णय, भारतीय सस्तो उत्पादन आयात गर्न अनुमति’ शीर्षकमा मुख्य समाचार छापेको छ ।

त्यसैगरी पत्रिकाले सचिवमाथि सचिव, ६ मन्त्रालयमा दुई–दुई सचिव, अधिकारमा अलमल, कार्यसम्पादनमा समस्या शीर्षकमा अर्को समाचार छापेको छ । स्वास्थ्य तथा जनसंख्यामा मन्त्रालयमा सचिवको किचलो भएको महिनौं भइसक्यो ।

प्रधानमन्त्री कार्यलय तानिएकी सचिव डा. पुष्पा चौधरी अदालत गुहार्न पुगिन् । उनको थमौती भयो । त्यसपछि मन्त्रालयमा दुई जना सचिव राख्ने व्यवस्था गरियो । अर्का सचिव केदारबहादुर अधिकारी मन्त्रालय पुगे । तर दुई जना सचिवले मिलेर काम गर्न सकेका छैनन् ।

यस्तै पत्रिकाले ‘दण्ड होइन, नियन्त्रणबाट भ्रष्टाचारको अन्त्य’ शीर्षकमा अर्को समाचार छापेको छ । भ्रष्टाचार विषवृक्ष जस्तै फैलने हुनाले यसलाई समाप्त पार्न आवश्यक छ, राष्ट्रपति विद्यादेवी भण्डारीले भनेकी छिन् । त्यसैगरी प्रधानमन्त्री केपी शर्मा ओलीले कसैले भ्रष्टाचार लुकाउन खोज्छ भने त्यो काराबाहीको दायरामा आउने बताएका छन् ।