ललितपुर- रेष्टुरेण्टमा रोजगारी लगाइदिन्छु भन्दै किशोरीलाई अवैध धन्दामा लगाएको आरोपमा प्रहरीले दुई जनालाई पक्राउ गरेको छ ।

विभिन्न प्रलोभन देखाएर किशोरीलाई जबरजस्ती यौनधन्दामा लगाउने गरेको आरोपमा २ जना होटल सञ्चालकलाई ललितपुर प्रहरीले पक्राउ गरेको हो । पक्राउ पर्नेमा रामेछापको खाडादेबी गाउँपालिका–५ का ३० वर्षीय सुजन कार्की र सोही गाउँपालिका वडा नम्बर ४ घर भएका वर्ष २४ का रामचन्द्र कार्की रहेका छन् ।

विभिन्न जिल्लाका किशोरीहरुलाई काममा लगाइदिन्छु भन्ने प्रलोभनमा पारी सोही रेष्टुरेण्टमा ल्याई शारीरिक सम्पर्क गर्न बाध्य गराई मानव बेचबिखन ओसारपसार तथा वेश्यावृति गराएको आरोपमा उनीहरुलाई पक्राउ गरिएको महानगरीय प्रहरी परिसरका ललितपुरका प्रवक्ता प्रहरी नायब उपरीक्षक नरेन्द्र चन्दले जानकारी दिए ।

उक्त रेष्टुरेण्टबाट ४ जना किशोरीको समेत उद्धार गरिएको छ। उनीहरुले ललितपुर–२ सानेपामा रुफटप रेष्टुरेण्ट एण्ड बार सञ्चालन गर्दै आएका थिए ।