काठमाडौँ– पाकिस्तानमा सात वर्षे बालिकासँग विवाह गर्नका लागि दुई नाबालकलाई यातना दिएको आरोपमा एक जना पक्राउ परेका छन् । पाकिस्तानको पञ्जाब प्रान्तको लाहोर सहरका प्रहरीले जनाएअनुसार यातना पाएकामध्ये एक बालकको ज्यान समेत गएको छ ।

घटनाका मुख्य अभियुक्त अबुल हसनलाई पक्राउ गरिएको प्रहरीले जनाएको छ । उनले सात वर्षे बालिकासँग विवाह गर्नका लागि भन्दै आफ्नो घरमा काम गर्ने दुई बालकलाई यातना दिएका थिए ।

प्रहरीले उनको साथबाट सात वर्षे बालिकालाई समेत नियन्त्रणमा लिएको छ । ती बालिका यातना पाउने बालकहरुको बाहिनी रहेको जनाइएको छ ।

प्रहरीका अनुसार यातना पाएका १० वर्षे बालकको मृत्यु भएको छ भने अर्का ६ वर्षे बालक घाइते छन् ।

अनुसन्धानकर्ताका अनुसार अभियुक्त अबुल हसनले आफू आध्यात्मिक गुरु रहेको बताउने गरेका थिए । ती बालबालिकाका बुवा पनि बेलाबेला उनको घरमा आउने गरेका थिए ।

पछि उनकै बुवाले आफ्नी सात वर्षे छोरीलाई विवाह गराउन राजी भएका थिए । प्रहरीले उनको स्थानबाट डोरीले बाँधिएको अवस्थामा बालबालिकालाई फेला पारेको थियो ।