एजेन्सी – दक्षिण कोरियाली अभियोजनकर्ताले पूर्व प्रधानन्यायाधीशले शक्तिको दुरुपयोग गरेको तथा बेइमानी गरी आफ्ना फैसला सुनाउने गरेको अभियोगमा अभियोग दर्ता गरेका छन् ।

सन् २०११ देखि सन् २०१७ सम्म प्रधानन्यायाधीश रहेका याङ सुन ताएले त्यसबीच गरेका फैसलामा गम्भीर अनियमितता भएको भन्दै उनीविरुद्ध ४७ अभियोगमा मुद्धा दर्ता गरिएको दक्षिण कोरियाको योन्हाप समाचार संस्थाले जनाएको छ ।

उनीमाथि दोश्रो विश्वयुद्ध ताका कोरिया जापानको अधिनमा रहँदा जापानी कम्पनीले प्रयोग गरेको बधुँवा मजदुरका विषयमा अनियमितता गरी फैसला सुनाएको अभियोग लागेको छ । त्यस्तै उनले पूर्व राष्ट्रपति पार्क गुन हेइको सरकारलाई फाइदा पुग्नेगरी केही विवादास्पद फैसलामा ढिलाई गरेको पनि अभियोग पत्रमा उल्लोख भएको योन्हापले जनाएको छ ।

प्रहरीले उनलाई गत महिना गिरफ्तार गरेको थियो । यससँगै याङ दक्षिण कोरियामा आफ्नो फैसलाका विषयलाई लिएर मुद्धा दायर खेप्ने पहिलो पूर्वप्रधानन्यायाधीश बनेका छन् । उनको मुद्धाका विषयमा हुने सुनुवाईको मिति भने तोकिएको छैन ।