एजेन्सी– पोलर बियर अर्थात् ध्रुवीय भालुले आतंक मच्चाएपछि रुसी अधिकारीहरुले सुदुर उत्तरी नोभाया जेम्ल्या टापुमा रहेका मानववस्तीमा संकटकालको घोषणा गरेका छन् ।

खानेकुराको अभावमा भोकमरीले ग्रस्त भालुहरुको ठूलो समूहले ३ हजार जनसङ्ख्या रहेको टापुमा अतिक्रमण गरेको बताइएको छ । भालुको अतिक्रमणका कराण स्थानीयहरुले सहयोगको याचना गरेपछि त्यहाँ संकटकालको घोषणा गरिएको हो ।

भालुले गरिरहेको अतिक्रमणको अध्ययन तथा त्यसको समाधानका लागि त्यहाँ वातावरणसम्बन्धी विशेषज्ञको टोलीलाई परिचालन गरिएको अधिकारीले जनाएका छन् । नोभाया जेम्ल्या टापु सुमेरु बृत्तमा पर्छ ।

रुसमा ध्रुवीय भालुलाई संकटग्रस्त प्रजातीको सूचिमा राखिएकाले भालुलाई मार्न पाइँदैन । विश्वव्यापी तापक्रम बृद्धिका कारण ध्रुवीय क्षेत्रमा बसोबास गर्ने भालुहरु मानववस्ती भएका क्षेत्रतर्फ आकर्षित भइरहेको बताइन्छ ।