काठमाडौँ– काठमाडौं महानगरपालिकाका मेयर बालेन्द्र साहले काठमाडौंको बानेश्वर, बिजुलीबजार लगायतका क्षेत्रमा पुगेर अनधिकृतरूपमा राखेका पसल लगायतका संरचना तत्काल हटाउन पुन:  निर्देशन दिएका छन् । 

नक्सापासमा रहेको मापदण्ड विपरीतको संरचना हटाउने अभियानलाई तीव्र पारेको महानगरले बिहीबार बिभिन्न स्थानमा पुगेर अनधिकृत संरचना हटाउन पुन:  निर्देशन दिएका हुन् । 

यसअघि महानगरले अनधिकृत संरचना हटाउन ३५ दिने सूचना निकालेको थियो । तर केही व्यापारीहरूले अटेर गरेपछि महानगरले डोजर लगाएर नै अनधिकृत संरचना हटाउन थालेको छ । महानगरको उक्त कदमप्रति केहीले तीव्र असन्तुष्टि पोखेका छन् । 

व्यापारीहरूले महानगरको ३५ दिने सूचनाबारे घरबेटीले आफूहरूलाई जानकारी नै नगराएकाले केही दिनको म्यान दिन आग्रह गरेका थिए । त्यस्तै बिहीबार बिजुलीबजारमा रहेको अल्फाबिटा कम्प्लेसको निरीक्षण गर्ने क्रममा बालेन्द्र साह र कम्प्लेसका प्रतिनिधिबीच भनाभन नै भएको थियो ।

 एउटा प्रयोजनका लागि बनाइएको संरचना अर्को प्रयोजनमा प्रयोग भएको भन्दै महानगर एक्सनमा उत्रेको हो ।