काठमाडौँ– विश्व आर्थिक मञ्चले सार्वजनिक गर्ने विश्वव्यापी लैङ्गिक समानता सूचकमा पाकिस्तान पुछारबाट दोस्रो स्थानमा रहेको छ ।

पाकिस्तानबाट प्रकाशित हुने द नेशन पाकिस्तानका अनुसार यस सूचक सार्वजनिक भएसँगै त्यहाँ लैङ्गिक असमानताको विषयमा चर्चा सुरु भएको छ ।

यद्यपि केही क्षेत्रमा भने पाकिस्तानमा महिलाको सहभागिता सुधारोन्मुख रहेको पाइएको छ । हालै पाकिस्तानको राष्ट्रिय तथ्यांक एवम् दर्ता प्राधिकरणले सार्वजनिक गरेको तथ्यांकमा सन् २०१८ मा भएको आम निर्वाचनयता १ करोड महिलाले मताधिकार पाएको द नेशनले जनाएको छ ।

यससँगै पाकिस्तानमा महिला मतदाताको संख्या झण्डै ५ करोड ७० लाख पुगेको छ । सन् २०१७ मा पाकिस्तानको तथ्यांक एवम् दर्ता प्राधिकरण एवम् निर्वाचन आयोगले लैङ्गिक असमानता न्यूनीकरणका लागि थालेको अभियान अनुसार महिला मतदाताको संख्या बढेको द नेशनले जनाएको छ ।

यद्यपि नयाँ मतदाताका रुपमा दर्ता भएका महिलाहरुले निर्वाचनका दिन मत हाल्न आउनसक्ने वातावरण भने अझै बनिनसकेको जनाइएको छ । परिवारले बाहिर जान नदिने एवम् अन्य कुप्रथाका कारण अझै पनि पाकिस्तानमा महिलाहरु म्तदान अधिकारबाट बञ्चित रहँदै आएका छन् ।

पाकिस्तानको संविधानको धारा २५ ले सबै नागरिकलाई कानूनका अगाडि समान मानेको छ । त्यसैगरी सन् २०१७ को निर्वाचन ऐनमा १० प्रतिशत महिला मतदाताको संख्या नपुगेको खण्डमा मतदान नै रद्द हुने प्रावधान रहेको छ ।