अछाम- अछामका केही दुर्गम स्थानका स्वास्थ्यकर्मीहरू ज्यान जोखिममा राखेर जनतालाई स्वास्थ्य सेवा दिइरहेका छन्। जिल्लाका दुर्गम ठाउँमा सहज यातायातको पहुँच नहुँदा जोखिम मोलेर भए पनि जनतालाई स्वास्थ्यकर्मीले सेवा प्रदान गरिरहेका छन् ।

गाउँघरमा नियमित खोप सञ्चालन गरिरहँदा होस् या अन्य कोरोना लगायतका खोप सञ्चालन गर्न गाउँघरमा जाँदा स्वास्थ्यकर्मीले ठुलो दुख कष्ट भोग्नु परिरहेको छ । ठुला ठुला खहरे खोला र भिर पाखाको सामना गर्दै जोखिम मोलेर गाउँघरसम्म पुग्नु पर्ने बाध्यता स्वास्थ्यकर्मीलाई छ ।

जिल्लाको रामारोशन गाउँपालिका वडा नम्बर ७ सुतारमा गाउँघर क्लिनिकद्वारा खोप दिन गएका स्वास्थ्यकर्मीहरू जोखिम मोलेर खोला तरिरहेको तस्बिर सार्वजनिक भएको छ । सुतार स्वास्थ्य चौकी बाट करिब ३ घण्टाको पैदल दुरी हिँडेर खोला तर्नु पर्ने बाध्यता रहेको रामारोशन गाउँपालिका स्वास्थ्य शाखा संयोजक प्रभुनाथ देवकोटाले जानकारी दिए ।

केही दिन अघि खोप प्रदान गर्न गएका दुई जना स्वास्थकर्मीहरुको तस्बिर सार्वजनिक भए पछि अहिले उक्त ठाउँमा स्थानीय बासीले केही सहजताका लागी काठको पुल निर्माण गरिसकेको उनले बताए । यता जिल्ला स्वास्थ्य कार्यालय अछामका जनस्वास्थ्य अधिकृत झनक ढुंगानाले स्वास्थ्यकर्मीहरूले जोखिम मोलेर खोला पार गर्न लागेको तस्बिर सामाजिक सञ्जालमा राख्दै सरकारको ध्यानाकर्षण गराएका छन् ।

उनले तस्बिर सार्वजनिक गर्दै लेखेका छन्,स्वास्थ्यकर्मीले खोप तथा क्लिनिक सञ्चालन गर्न कहिले सम्म यसरी जोखिममा जानू पर्ने हो ? स्थानीय सरकार, प्रदेश सरकार धेरै ठूलो बजेट पनि चाहिँदैन होला सानो झोलुङ्गे पुल बनाउन ।

जिल्लाका दुर्गम क्षेत्रमा वर्षाका बेला खोला नाला बढ्ने र पुल समेत नुहदाँ यात्रा गर्न कठिनाइ भइरहेको छ । जिल्लाका भुलु रहफ, सुतार सिउडी सोकट लगायतका दुर्गम ठाउँमा सहज यातायातको व्यवस्था नुहदाँ स्वास्थ्यकर्मीले समेत जोखिम मोलेर यात्रा गर्नु परिरहेको छ।

जिल्लाका दुर्गम क्षेत्रमा वर्षाका बेला खोला नाला बढ्ने र पुल समेत नुहदाँ यात्रा गर्न कठिनाइ भइरहेको छ ।