काठमाडौँ- भारतमा ३४ करोड मानिसहरुले विद्युतीय कारोबार गर्ने गरेको तथ्यांक प्रकाशित भएको छ ।

भारतको इन्टरनेट एन्ड मोबाइल एसोसिएसन अफ इण्डियाले प्रकाशित गरेको तथ्यांकमा भारतमा अनलाइनमार्फत् विद्युतीय कारोबार गर्ने मानिसहरुको संख्या ३४ करोड ६० लाख रहेको छ ।

यो सङ्ख्या अमेरिकाको कूल जनसंख्या ३३ करोड १० लाख भन्दा बढी रहेको भारतीय अखबार द हिन्दुको बिजनेस अनलाइन संस्करणले जनाएको छ ।

‘विश्वव्यापी महामारीले अनलाइन कारोबारमा दुई वर्षमा ५१ प्रतिशतले वृद्धि भएको देखिएको छ । सन् २०१९ मा २३ करोड रहेकोमा अहिले ३४ करोड ६० लाख पुगेको छ ।’ उक्त एसोसिएसनलाई उद्धृत गर्दै द हिन्दुले जनाएको छ ।

भारतमा मानिसहरु प्रायः मनोरञ्जन, सञ्चार एवम् सामाजिक सञ्जालका लागि मानिसहरुले इन्टरनेटको प्रयोग गर्दै आएका छन् ।