खाँदबारी- संखुवासभाको मकालु गाउँपालिकाको पेपुवाका बाढीपहिरो विस्थापितका लागि राहत सामग्री ढुवानी गरिएको छ । तुम्लिङ्टार विमानस्थलबाट नेपाली सेनाको हेलिकप्टरमार्फत राहत सामग्री ढुवानी गरिएको हो ।

आइतबार प्रतिकूल मौसमका कारण राहत सामग्री ल्याउन सकिको थिएन । मकालु गाउँपालिकाका उपाध्यक्ष चमेली राईका अनुसार गाउँपालिकाले ११७ बोरा चामल, १२ बोरा दाल, १ सय किलो नुन र ७२ थान त्रिपाल खरीद गरेको थियो ।

पहिरोबाट मकालु–५, पेपुवाका चार गाउँका २९ परिवार विस्थापित भएका छन् । २२ घर उच्च जोखिममा रहेको राईले बताए । विस्थापित २९ परिवारलाई सुरक्षित स्थानमा स्थानान्तरण गरिएको छ । ती परिवारका वृद्धवृद्धा र बालबालिकालाई हेलिकप्टरबाट गाउँपालिकाको केन्द्रमा ल्याइएको छ ।