काठमाडौं – आईसीसी एकदिवसीय विश्वकप क्रिकेट अन्तरगर्त आज (सोमबार) बंगलादेश र अफगानिस्तानले प्रतिस्पर्धा गर्दैछन् । साउथ ह्यामटनस्थित ह्याम्पसायर बोमा हुने खेल नेपाली समय अनुसार सबा ३ बजे शुरु हुनेछ ।

विश्वकपमा अहिलेसम्मका खेलमा राम्रो प्रदर्शन गर्न नसकेको अफगानिस्तानसँगको खेलमा बंगलादेश सहज जीतको खोजिमा रहेको छ । तर, गएको शनिबार भारतविरुद्ध उत्कृष्ट प्रदर्शन गर्दा पनि हार व्यहोरेको अफगानिस्तान बंगलादेशसँग अंक खोस्ने लक्ष्यसहित मैदान उत्रिनेछ ।

६ खेल खेलिसक्दा विश्वकपको अंक तालिकामा अंक जोड्न नसकेको अफगानिस्तान ७ औं खेलसम्म आइपुग्दा पनि अंक तालिकामा खाता खोल्ने लक्ष्यमै रहेको छ ।

विश्वकपमा बंगलादेशका शाकिब अल हसनले चर्चा पाइरहेका छन् । उनले टोलीका लागि महत्वपूर्ण जित निकाल्न योगदान दिएका छन् भने अन्य ब्याट्सम्यानहरु पनि लय समाती रहेका छन् । त्यस्तोमा अफगानिस्तानलाई अफ्ठ्यारो पर्न सक्छ ।

यद्यपी, अफगानिस्तानका लागि मोहम्मद नाभि पनि आक्रामक र टिकेर खेल्न सक्ने ब्याट्सम्यान छन् । उनी माथि अफगानिस्तानको ब्याटिङको भरोसा रहन्छ । तालिकामा अंक जोड्न नसकेको अफगानिस्तान पुछारमा रहँदा बंगलादेशले ६ खेलबाट ५ अंक जोडेर तालिकाको छैठौं स्थानमा रहेको छ । अफगानिस्तानलाई पराजित गर्दै अंक तालिकामा माथि उक्लिने लक्ष्यमा बंगलादेश रहेको छ ।