एजेन्सी– सीमा सुरक्षाका विषयमा अमेरिकी राजनीतिक पार्टीबीच भएको वार्ता असफल भएपछि अमेरिकामा फेरी सरकारी कामकाज ठप्प हुनसक्ने चिन्ता शुरु भएको छ ।

सीमा सुरक्षाका विषयमा अमेरिकाका दुई राजनीतिक पार्टीहरु रिपब्लिकन र डेमोक्र्याटिक पार्टीका नेताहरुबीच भएको वार्ता असफल भएको हो ।  दुई पार्टीका नेताहरुबीच बन्दी बनाइने अवैध आप्रवासीको सङ्ख्याका विषयमा मतभेद देखिएको अमेरिकी सञ्चारमाध्यमले जनाएका छन् । डेमोक्र्याट नेताहरुले १६ हजार ५ सयभन्दा धेरै आप्रवासीलाई बन्दी बनाउन नहुने पक्षमा रहेको बताइन्छ ।

अमेरिकाको होमल्याण्ड सेक्युरिटी र अन्य संघीय निकायको खर्च गर्ने म्याद यही शुक्रबार सकिँदैछ । दुबै पार्टीबीच सोमबारभित्र सम्झौता भई कङ्ग्रेसबाट शुक्रबार अघि नै यसविषयको प्रस्ताव पारित गराउने कार्यक्रम तय भएको थियो । तर, सहमतिका लागि भएको छलफलमा कुनै उपलब्धी नभएपछि अमेरिककमा सरकारी कामकाज ठप्प हुनसक्ने चिन्ता बढेको हो ।

सोमबारभित्र सम्झौता गर्ने अन्तिम तयारी भइरहेपनि तत्काल त्यसको संभावना निकै कम रहेको नेताहरुले जनाएका छन् । यसअघि मेक्सिकोसँगको सीमानामा पर्खाल लगाउने विषयमा गतमहिना अमेरिकामा इतिहासकै सबैभन्दा लामो ३५ दिन सरकारी कामकाज ठप्प भएको थियो । त्यसबाट अमेरिकी अर्थतन्त्रले १ अर्ब १० करोड भन्दा धेरै नोक्सान व्यहोरेको थियो ।