अमेरिका– हवाई आक्रमण अन्तिम समयमा रोकेको अमेरिकाले इरानको हतियार प्रणालीमा आक्रमण थालेको छ ।

रकेट तथा मिसाइल लञ्चरलाई नियन्त्रण गर्ने कम्प्युटर प्रणालीलाई लक्षित गरी अमेरिकाले इरानको हतियारसम्बन्धी इन्टरनेट प्रणालीमा साइबर आक्रमण गरेको हो ।

इरानले अमेरिकी गुप्तचर ड्रोन खसालेपछि अमेरिकाले इरानमाथिको आक्रमणलाई तीव्रता दिएको अमेरिकी सञ्चारमाध्यमहरुले जनाएका छन् । ड्रोन इरानले खसालेपछि दुई देशबीच तनाव बढेको छ । सोही आक्रमणको बदलामा अमेरिकाले साइबर आक्रमण गरेको जनाइएको छ ।

इरानले परमाणु हतियार बनाइरहेकाले उमाथि थप प्रतिबन्ध लगाउने घोषणा समेत अमेरिकाले गरिसकेको छ । आर्थिक प्रतिबन्ध र दबाबबाट मात्रै इरानले परमाणु कार्यक्रम रोक्ने ट्रम्पको भनाइ छ ।

इरानले अमेरिकी ड्रोन खसालेपछि राष्ट्रपति ट्रम्पले इरानको प्रतिकारका लागि अमेरिकी सेना तयार रहेको बताएका थिए । उनले इरानको प्रतिकारका लागि बन्दुक लोड भइसकेको  समेत दाबी गरेका थिए ।

इरानको रिभल्यूशनरी गार्ड कर्प्सले गत बुधबार दक्षिणी इरानको हर्मोजगान प्रान्तस्थित जलक्षेत्रको आकाशमा उडान भरेको ‘आरक्यू–४ ग्लोबल हक’ नामक चालकरहित ड्रोन खसालेको थियो ।