काठमाडौँ– पाकिस्तानको पञ्जाब प्रान्तमा २६३ वटा अवैध अस्पतालहरु बन्द गराइएको छ । भारतीय समाचार संस्था एएनआईले जनाएअनुसार पञ्जाब प्रान्तको जनस्वास्थ्य आयोगले गत महिनामा प्रान्तका ११ जिल्लामा गैर कानूनी रुपमा सञ्चालित २६३ वटा अस्पताल बन्द गरिदिएको हो ।

प्रान्तमा अवैध अस्पतालको बिगबिगी बढेको सूचनाका आधारमा आयोगले कारवाही अघि बढाएको जनाइएको छ । यसक्रममा आयोगले प्रान्तका १ हजार ४ सय ७३ वटा अस्पतालमा छापा मारेको जनाइएको छ ।

प्रान्तीय राजधानी लाहोरका मात्रै १२२ अवैध अस्पताल बन्द गरिएको पाकिस्तनाबाट प्रकाशित हुने द एक्सप्रेस ट्रिब्युनको अनलाइन संस्करणले जनाएको छ ।

अवैध अस्पतालहरुबाट बिरामीको स्वास्थ्यमा जोखिम उत्पन्न हुने तथा ती अस्पतालहरुले कर नतिर्ने भएका कारण कारवाही अघि बढाइएको आयोगले जनाएको छ ।