काठमाडौं – काठमाडौंको चावहिल-साँखु खण्डअन्तर्गतको थली-साँखु सडकखण्ड स्तरोन्नती गर्ने कार्य कार्यन्वयन नभएपछि स्थानीयवासीले आइतवार थलीमा पुन आन्दोलन गरे ।

जेठ २८ गते स्थानीयवासीले सडक कालोपत्रे नभएको भन्दै टायर बालेर अनिश्चितकालीन बन्दको आवह्न समेत गरेका थिए ।

आन्दोलनपछि स्थानीय संघर्ष समिति र नगरपालिकाबीच तत्काल सडकमा देखिएको खाल्डाखुल्डी पुर्ने र एक हप्ताभित्र बाटो ग्रेडिङ गरी आवतजावत सहज बनाउने साथै तत्काल सडक निर्माणका लागि सडक बोर्डमा पहल गर्ने सहमति भएको थियो ।

तर हप्तादिन बितिसक्दा पनि सडक जस्ताको त्यस्तै भएपछि स्थानीयहरु पुन आन्दोलित बन्न पुगेका हुन् । आइतवार बिहान स्थानीयले १ घण्टासम्म सवारी आवगमनमा अवरोध पुर्‍याएका थिए ।

स्थानीयले सडक बन्द गरेसँगै नगरपालिकाले तत्काल सो सडकमा डोजर चलाउन शुरु गरेको थलीबाट निश्चल नेपालले खबरहबलाइ जानकारी दिए । ‘अहिले सडकको नाली खन्ने काम भइरहेको छ’ उनले भने ।

४ वर्षदेखि कालोपत्रे हुन नसकेको सो सडक खाल्डाखुल्डीले भरिएको छ । मोटरसाइकल तथा स्कुटर जस्ता साना सवारी साधन दिनहु सडकमा चिप्लने र दुर्घटना भइरहने स्थानीयले गुनासो गरेका थिए ।

त्यति मात्र होइन, पछिल्ला समय यो सडकमा मालबहाक सवारी साधन गुडिरहँदा सडक झनै दयनीय बन्दै गरेको उनीहरुको भनाइ छ । पानी परेसँगै सडकका खाल्डाखुल्डीमा पानी जमेर स्थानीयले कष्टकर जीवन बिताइरहेका छन् ।

यो पनि पढ्नुहोस्

चाबहिल-साँखु सडक खण्डः समस्यै-समस्याको पोको, कहिले फुक्छ गाँठो ?

तस्वीर : निश्चल नेपाल