बार्सिलोना र आर्सनलबीच प्रतिस्पर्धा हुने भएको छ । नयाँ सिजन शुरु हुनुभन्दा पहिला बार्सिलोनाले आर्सनलसँग खेल्न लागेको हो ।

स्पेनिस क्लब बार्सिलोनाले हरेक वर्ष नयाँ सिजन सुरु हुनुअघि मैत्रीपूर्ण खेलका रूपमा ‘जोन ग्याम्पर ट्रफी’ प्रतियोगिता आयोजना गर्ने गरेको छ । त्यसकै निरन्तरता स्वरुप उसले आगामी सिजनको शुरुवातका लागि आर्सनलसँग प्रतिस्पधाृ गर्दै छ ।

ग्याम्पर ट्रफीको ५४ औं श्रृंखला अन्तर्गत आगामी अगस्ट चारमा बार्सा र आर्सनल भिड्न लागेका हुन् ।

बार्सिलोनाको घरेलु मैदानमा फुटबल फ्यानहरुले स्पानिस र इंग्लिस क्लबबीचको प्रतिस्पर्धा हेर्न पाउने भएका हुन् ।

के हो ‘ग्याम्पर ट्रफी’ ?

बार्सिलोनाले हरेक सिजन शुरु हुनुभन्दा पहिला कुनै पनि क्लवलाई निमन्त्रणा गरेर खेल आयोजना गर्ने गरेको छ । त्यसका लागि क्लब आफैंले निर्णय गरेर एक पाहुना क्लबलाई निम्ता गर्छ । उसले आफ्नो निर्णयअुनसार जुनसुकै क्लबलाई पनि यस प्रतियोगितामा बोलाउन सक्छ ।

यसपटक सिजन २०१९/२० सुरु हुनुअघि उसले आयोजना गर्ने यस प्रतियोगितामा इंग्लिस क्लब आर्सनललाई पाहुना टोलीका रूपमा डाक्ने निर्णय गरेको हो ।

आर्सनल बार्सिलोनाले आयोजना गर्ने यो प्रतियोगिता खेल्ने छैटौं इंग्लिस टिम बनेको छ । बार्सा र आर्सनल च्याम्पियन्स लिगमा पाँच पटक भेट भएका छन् । पहिलो पटक लिग चरणमा उनीहरुको भेट १९९९/२००० सिजनमा भएको थियो ।

सन् २००६ को च्याम्पियन्स लिग दुबैका लागि महत्वपूर्ण भएका थिए । पेरिसमा भएको उक्त फाइनल खेलमा बार्साले आर्सनललाई २–१ ले पराजित गरेको थियो ।

पछिल्लो खेल भने सन् २०१५/१६ मा भएको थियो जसमा बार्सिलोना समग्रमा ५–१ ले विजयी भएको थियो ।