काठमाडौं – स्पेनलाई विश्वकप फुटबल जिताएका स्ट्राइकर फर्नान्डो टोरेसले अन्तर्राष्ट्रिय फुटबलबाट सन्यास लिएका छन् ।

३५ वर्षीय टोरेसले आफ्नो १८ वर्षे अन्तर्राष्ट्रिय फुटबल करियरलाई टुङ्ग्याउने निर्णय गरेका हुन् । स्पेनको एट्लेटिको मड्रिड, इंग्ल्याण्डमा लिभरपुल र चेल्सी जस्ता क्लबबाट ब्यावसायीक फुटबल खेलेका उनी अहिले जापनिज जे लिग क्लब सोगा तोसुबाट खेलिरहेका छन्।

उनले स्पेनको राष्ट्रिय टिमबाट एक सय १० खेल खेलका छन् । स्पेनलाई सन् २००८ को युरो कपको उपाधि जिताउने क्रममा उनले फाइनलमा विजयी गोल गरेका थिए । यस्तै २०१० को विश्वकप र २०१२ को युरो कप स्पेनले जित्दा टोरेस मुख्य खेलाडीका रुपमा टिममा थिए ।

टोरेसले सामाजिक सञ्जाल ट्वीटरबाट सन्यासको घोषणा गरेका हुन् ।

आउँदो आइतबार जापानको टोकियोमा पत्रकार सम्मलेन गरेर टोरेसले सम्पुर्ण विवरण सार्वजनिक गर्ने समेत जनाएका छन् ।

सन् २००७ मा एट्लेटिकोबाट २० मिलियन पाउण्डमा लिभरपुल गएपछि उनको करियरले चर्चा पाएको थियो। लिभरपुलका लागि उनले एक सय ४२ खेलमा ८१ गोल गरेका थिए। यस्तै सन् २०११ उनी लिभरपुलबाट बेलायती क्लबको रेकर्ड तोड्दै ५० मिलियन पाउण्डमा चेल्सीमा अनुबन्ध भएका थिए।