धनगढी – धनगढी प्रिमियर लिग (डीपीएल) अन्तर्गत सोमबार भएको दोस्रो खेलमा रुपन्देही च्यालेन्जर्सले महेन्द्रनगर युनाइटेड समक्ष १ सय १२ रनको विजयी लक्ष्य प्रस्तुत गरेको छ ।

फाप्ला क्रिकेट मैदानमा महेन्द्रनगरविरुद्ध टस जितेर पहिलो ब्याटिङ गरेको रुपन्देही २० ओभरमा अल आउट हुँदै १ सय ११ रन बनाएको हो । महेन्द्रनगर युनाइटेडका बलरको सशक्त प्रदर्शन रह्यो ।

रुपन्देहीका लागि सुमित महर्जनले २५ रन बनाउनु बाहेक अन्य खेलाडीहरुले धेरै रन जोड्न सकेनन् । विनोद भण्डारीले १९ रन, विक्रम सोवले १६ तथा सन्दीप सुनारले १५ रन बनाएका थिए । कप्तान वसन्त रेग्मी र ललितसिंह भण्डारी शुन्यमा आउट हुँदा अन्य ब्याट्सम्यानले दोहोरो अंक जोड्न सकेनन् ।

रुपन्देहीविरुद्ध महेन्द्रनगरका सिद्धान्त लोहनी, सागर ढकाल, अभिनास बोहराले उत्कृष्ट बलिङ गरे । सिद्धान्तले सर्वाधिक ३ विकेट लिँदा सागर ढकाल र अभिनास बोहराले समान २—२ विकेट लिए भने कप्तान शरद भेषावकरले १ विकेट लिए ।