दुबई– इरानले अमेरिकी सैनिक ड्रोन खसालेपछि अमेरिका र इरानबीच बाकयुद्ध चर्किएको छ ।

अमेरिकाले अन्तर्राष्ट्रिय आकाशमा उडिरहेको आफ्नो नौसेनाको ड्रोन बिनाकारण खसालेको आरोप लगाएको छ भने इरानले आफ्नो जलक्षेत्रमाथिको आकाशमा उडिरहेको अमेरिकी जासुसी चालकरहित विमान खसालेको दाबी गरेको छ । इरानले अमेरिकाले युद्ध नै चाहेको हो भने आफ्ना सैनिक तयारी अवस्थामा रहेको चेतवानी समेत दिएको छ ।

इरानले आफ्नो मुलुकको होर्मुजगान प्रान्तको जलक्षेत्रमाथिको आकाशमा उडिरहेको अमेरिकी ‘आरक्यू–४ ग्लोबल हक’ नामक ड्रोन स्थानीयस्तरमा उत्पादित ‘३ कोहार्द’ नामक क्षेप्यास्त्रद्वारा खसालिएको दाबी गरेको छ । अर्को तर्फ अमेरिकाले भने अन्तर्राष्ट्रिय आकाशमा उडान भरेको अमेरिकी नौसेनाको ‘एमक्यू–४जी ट्राइटन’ नामक ड्रोन खसालिएको जनाएको छ ।

अमेरिकाले बिनाकारण उक्त आक्रमण गरिएको दाबी गरेको छ । इरानले उक्त ड्रोनले आफ्नो हवाई क्षेत्रको उल्लङ्घन गरेको र यस्तो कदम असह्य रहेको चेतावनी समेत दिएको छ ।

केही समयअघिमात्र त्यस क्षेत्रमा तेल बोकेका दुई ट्यांकरमा आक्रमण भएपछि मध्यपूर्वमा तनाव चर्किरहेको छ । अमेरिका र साउदी अरबसहित अन्य खाडीका मुलुकले उक्त आक्रमणमा इरानको संलग्नता रहेको आरोप लगाउँदै आएका छन् भने इरानले उक्त आक्रमणमा आफ्नो संलग्नता अस्वीकार गर्दै आएको छ ।