काठमाडौँ– सभामुख अग्निप्रसाद सापकोटाले संवैधानिक परिषद्सम्बन्धी विधेयकका विषयमा चर्चा गर्न आवश्यक नभएको बताएका छन् । 

सोमबार सिंहदरबारमा पत्रकारहरूसँग कुरा गर्दै सभामुख सापकोटाले संवैधानिक परिषद्सम्बन्धी विधेयक अर्को सभामा दर्ता भएकाले विधेयकबारे चर्चा गर्नु मनासिब नभएको बताएका हुन् । उनले विभिन्न संसदीय समितिका सभापति पद रिक्त रहेका सम्बन्धमा आफ्नो ध्यानाकर्षण भएको र प्रधानमन्त्रीका साथै पार्टीका नेताहरूसँग छलफल गरिरहेको बताए ।

उनले ढिलै भए पनि उपसभामुखको निर्वाचन भएसँगै संसद्को काम अझ प्रभावकारी ढंगबाट अगाडि बढ्ने उनले बताए । सभामुख सापकोटाले अहिले नागरिकता, संघीय निजामती विधेयकलाई अघि बढाउन ध्यान केन्द्रित गरेको र अरु महत्वपूर्ण विधेयक अघि बढाउन पहल भइरहेको जानकारी दिए । सभामुख सापकोटाले सङ्घीय सरकारका मन्त्री हेरफेरका कारण संसद् सचिवालयमा दर्ता भएका विधेयकमाथिकाे छलफल अगाडि बढाउन समस्या भएको बताए ।

उनले चालु अधिवेशनबाट १५ विधेयक पारित भएको र पाँच समितिका साथै विभिन्न संवैधानिक आयोगका प्रतिवेदन संसद्मा पेश भएको जानकारी दिए ।