काठमाडौं– प्रमुख प्रतिपक्षी दल नेपाली कांग्रेसका सांसद संजय गौतमले प्रधानमन्त्री केपी शर्मा ओलीबाट जनतालाई ढाँट्ने काम भएको बताएका छन् ।

घर–घरमा पेट्रोलको पाइप लाइन, पानीजहाजको कुरा गरेर प्रधानमन्त्रीबाट जनतालाई ढाँट्ने काम भएको गौतमको भनाइ छ ।

बिहीबार प्रतिनिधिसभा बैठकको विशेष समयमा बोल्दै गौतमले संस्कृति, पर्यटन तथा नागरिक उड्डयन मन्त्री नियुक्त नगरिएको विषयमा पनि प्रधानमन्त्रीको ध्यानाकर्षण गराए ।

‘आज वाइडबडीको कुरा पनि प्रधानमन्त्रीज्यूलाई नै सोध्नुपर्ने भएको छ । पर्यटन क्षेत्रमा यत्रो ठूलो अराजकता छ, यत्रो ठूलो अनियमतिता छ । नेपाल बायुसेवा निगमले करोडौं घाटा व्यहोरिरहनु परेको छ, प्रधानमन्त्री ज्यू आफैंले ठेक्का लिएर बस्नुभा’छ ’ गौतमले भने, ‘यत्रा सांसदज्यू हुनुहुन्थ्यो, कसैलाई मन्त्री बनाइदिएको भए हुन्थ्यो । जिम्मेवारी दिइदिएको भए हुन्थ्यो । मुलुकले कमसेकम बाटो लिन्थ्यो ।’

सांसद गौतमले सरकारले कनेक्टिभिटीलाई ध्यान नदिँदा पर्यटन क्षेत्रको विकास नभएको पनि टिप्पणी गरे ।