काठमाडौं– सत्तारुढ दल नेकपाका सांसद गंगा चौधरीले गुठीसम्बन्धी कानूनहरु एकीकरण गर्न बनेको विधेयक फिर्ता लिएर भूमिहीन किसानको गास–बास खोस्ने काम भएको बताएकी छन् ।

सरकारले गुठीहरुलाई व्यवस्थित र एकीकृत गर्न विधेयक ल्याउँदा खुसी भएका भूमिहीन किसानहरु विधेयक फिर्ता लिइएपछि निराश बनेको पनि चौधरीको भनाइ छ ।

बिहीबार प्रतिनिधिसभा बैठकको विशेष समयमा बोल्दै सांसद चौधरीले प्रमुख प्रतिपक्षी दल नेपाली कांग्रेसले गुठी विधेयकको विषयमा भ्रामक प्रचार गरेको पनि बताए ।

‘सामन्तवादी सोच भएका र खास गरेर प्रमुख प्रतिपक्ष नेपाली कांग्रेसले दुखीहरुको मुहारमा खुसी देख्न सकेन, गुठी विधेयकको बारेमा भ्रामक प्रचार गरेर चौतर्फी विरोध गर्न लगाएर गरिब भुमिहिन किसानहरुको छोरा छोरीको गाँसबास खोस्न प्रयास गरि विधेयक फिर्ता गर्न खेल खेल्यो,’ चौधरीले भने ।

गुठी विधेयक फिर्ताले गुठीपीडीत किसानहरुको भावनामा ठूलो चोट पुगेको पनि सांसद चौधरीको भनाइ छ । ‘गुठी विधेयक फिर्ताले गुठीपीडीत किसानहरुको भावनामा ठूलो ठेस पुगेको छ,’ चौधरीले भनिन् ।

धर्म र संस्कृतिको नाममा अहिले पनि सामन्त र मालिकहरुबाट नै राज्यसत्ता सञ्चालन भइरहेको पनि चौधरीले आरोप लगाइन् ।