बाजुरा – संस्कृति, पर्यटन तथा नागरिक उड्ड्यनमन्त्री बद्रीप्रसाद पाण्डेले कांग्रेस र नेकपा (एमाले)बीच गठबन्धन गर्नुका पछाडि राजनीतिक स्थायित्व भएको दाबी गरेका छन्‌ । गृह जिल्ला बाजुरा पुगेर मन्त्री पाण्डेले कार्यालय प्रमुखहरूको बैठकलाई सम्बोधन गर्दै उक्त कुरा बताएका हुन्‌ ।

‘पछिल्लो समय कांग्रेस-एमालेबीचको भएको सहकार्य राजनीतिक सकसलाई चिर्नका लागि हो । कांग्रेस-एमालेको सरकार गठनका पछाडि राजनीतिक स्थायित्व र समृद्धिका लागि हो’, मन्त्री पाण्डेले भने ।

उनले कांग्रेस-एमालेमात्रै होइन, प्रतिपक्षमा रहेका माओवादी,समाजवादी लगायतका सानादलहरूलाई समेटेर एक ठाउँमा लैजानका लागि यो सरकार गठन भएको पनि तर्क गरे ।

‘संसदीय दृष्टिकोणले हेर्दा सत्ता र प्रतिपक्षी भए पनि देशको गति दिन, अर्थतन्त्रलाई माथि उकास्न, राजनीतिक स्थिरता दिन र सुशासनको प्रत्याभूति दिनहामी सबै एक ठाउँमा हुन जरुरी छ,’ मन्त्री पाण्डेले थपे, ‘प्रधानमन्त्री केपी शर्मा ओली र हाम्रो पार्टी सभापतिज्यूको प्रतिवद्धता रहेको छ – देशको सुधारका लागि उहाँहरूको स्पिडमा काम गर्नुपर्नेछ ।’

उनले ०८४ मा हुने आम चुनावमा कांग्रेस र एमालेबीच नै प्रतिस्पर्धा हुने समेत दाबी गरे । फरक प्रसङ्गमा बोल्दै मन्त्री पाण्डेले सुचकाङ्कहरूका आधारमा सबैभन्दा गरिबी रहेका पाँच जिल्लामा सरकारले विशेष प्याकेज ल्याएर काम अघि बढाएको समेत बताए ।

उनले पछाडि परेको क्षेत्र, जाती र भूगोलको पक्षमा आफू मन्त्री नहुँदादेखि नै वकालत गरिरहेको समेत जनाए । कार्यालय प्रमुखहरूलाई कामका प्राथमिकता निर्धारण गरेरमात्र काम गर्न समेत मन्त्री पाण्डेले निर्देशन दिए ।

बूढीगंगा नगरपालिका र बडिमालिका नगरपालिकाको ज्ञापनपत्र बुझ्दै अन्तरमन्त्रालयबाट हुने कामका लागि समेत समन्वयात्मक भूमिका निर्वाह गर्ने प्रतिवद्धता पनि मन्त्री पाण्डेले जनाए ।