काठमाडौँ- गत शुक्रबार वैवाहिक जीवनमा बाँधिएका नायक हरिहर अधिकारी र नायिका नीता ढुंगानाले शनिबार याक एन्ड यति होटेलमा रिसेप्सन पार्टीको आयोजना गरे । आयोजित पार्टीमा फिल्मकर्मीसँगै उनीहरूको आफन्त र सञ्चारकर्मीको उपस्थिति रहेको थियो ।

पार्टीमा पुगेका नायक पुष्प खड्काले नीतासँग आफूले सुरुवाती समयमा भिडियोमा काम गरेको सम्झिए। ‘सुरुवाती समयमा भिडियो गर्दा नीताले मलाइ गाइड गर्नु भएको थियो । उहाँले सपोर्ट गर्नु भयो । उहाँ विवाह बन्धनमा बाधिनु भएको छ, शुभकामना’ पुष्पले भने । उनले नीता र हरिहरको प्रेम विवाहमा परिणत भएकोमा खुसी लागेको बताउँदै फिल्म नगरीमा सबै प्रेम असफल हुँदैनन् भन्ने उदाहरण बनेको बताए ।

‘फिल्म नगरीका प्रेम सबै असफल हुँदैनन् भन्ने उदाहरण नीता र हरिहर बन्नु भएको छ । किनकि हाम्रो क्षेत्रको स-साना कुराले पनि राम्रै चर्चा पाउने गर्छ’ उनले भने । पुष्पले आफ्नो प्रेम परेमा त्यसले विवाहको स्वरूप लिने पनि बताए ।

नीता र हरिहरको बिहे पार्टीमा अभिनेता राजेश हमाल, नायिका निशा अधिकारी, कलाकार जीतु नेपाल, नायिका नन्दिता केसी, विनय श्रेष्ठ , प्रशान्त ताम्राकार लगायत पुगेका थिए ।