खोटाङ– खोटाङको दिप्रुङ चुइचुम्मा गाउँपालिका र दिक्तेल रुपाकोट मझुवागढी नगरपालिका जोड्ने सडक कालोपत्रेको प्रारम्भिक चरणका काम थालिएको छ ।

दिप्रुङ चुइचुम्मा गाउँपालिका–१ याम्खा र दिक्तेल रुपाकोट मझुवागढी नगरपालिका–५ लफ्याङस्थित खानीडाँडा विमानस्थल जोड्ने १५ किलोमिटर लामो सडक कालोपत्रेका लागि स्ट्रक्चरको काम थालिएको हो ।

सडक कालोपत्रेका लागि प्रारम्भिक चरणका काम गर्न चालु आर्थिक वर्ष संघीय सरकारको समपुरक अनुदान २ करोड ५ लाख र प्रदेश सरकारको समपुरक अनुदान १ करोड विनियोजन गरिएको थियो ।

कालोपत्रेको पूर्वतयारीमा सडकको स्ट्रक्चर ग्याविन, होमपाईप, मेसिनरी ड्रेन लगायतका स्ट्रक्चरको काम गरिएको दिप्रुङ चुइचुम्मा गाउँपालिकाका सव–इन्जिनियर राजन खत्रीले बताए ।

कुल बजेट ३ करोड ५ लाख भए पनि निर्माण कम्पनी रामसागर–बिकेएसके जेभीले २ करोड २१ लाख ७ हजार ३५३ मा कालोपत्रेको प्रारम्भिक चरणको कामका लागि ठेक्का पारेको थियो। सो ठेक्काको सम्झौता म्याद आगामी २३ असारमा सकिने गाउँपालिकाले जनाएको छ।

विमानस्थलदेखि याम्खा सडक कालोपत्रेका लागि गाउँपालिकाले २० फागुन २०७८ मा ठेक्का आव्हान गरेको थियो ।

सडक कालोपत्रेको थप काम गर्न आर्थिक वर्ष २०७९र०८० मा संघीय सरकारबाट १ करोड ७० लाख, प्रदेशबाट १ करोड र प्रदेश भौतिक मन्त्रालयबाट २५ लाख बजेट विनियोजन भएको छ ।

साझेदारी योजना अन्तरगत सोही सडकका लागि गाउँपालिकाकातर्फबाट २ करोड विनियोजन गरिएको गाउँपालिका अध्यक्ष लोकेन्द्र राईले बताए ।

दिप्रुङ चुइचुम्मा गाउँपालिकालाई विमानस्थल र सदरमुकाम दिक्तेलसँग नजिक बनाउनका लागि छोटो दुरीको खानीडाँडा–याम्खा सडक निर्माण सुरु गरिएको थियो ।

खानीडाँडा–याम्खा सडक २४ भदौ २०७४ मा याम्खाको राटमाटामा आयोजित कार्यक्रममा तत्कालीन गाउँपालिका अध्यक्ष (हाल कांग्रेस प्रदेश महामन्त्री) प्रमुख भूपेन्द्र राईले शिलान्यास गरेका थिए । सो सडकका कारण याम्खा, टेम्मा, डाँडागाउँ, छितापोखरी, बतासे, छोरम्बु, चिप्रिङ लगायतका स्थानीयलाई सदरमुकाम आउजाउ गर्ने सबैभन्दा छोटो बाटो खुलेको छ । २०७२ सालमा सडक विभागबाट प्राप्त ८ लाख बजेटले कालेपत्रे गर्ने लक्ष्य सहित याम्खा–खानीडाँडा सडकको डिपिआर तयार पारिएको थियो ।

सडक विभागको ६ लाख अनुदानमा २०७२ सालमा खानीडाँडातर्फबाट ट्रयाक खोल्न सुरु गरिएको सडकका लागि २०७४ सालमा ७५ लाख विनियोजन गरेपछि याम्खातर्फबाट ट्र्याक खोल्ने काम सुरु गरिएको थियो ।

कांग्रेस नेता राईकै अवधारणा अनुसार बनेको सडक गाउँपालिकाभित्रका विरामीलाई खानीडाँडा विमानस्थल हुँदै सुविधा सम्पन्न अस्पताल पुर्‍याउनका लागि समेत उपयोगी हुने अपेक्षा गरिएको छ ।