काठमाडौं– नेकपा (एमाले) का अध्यक्ष केपी शर्मा ओलीले स्थानीय तहको निर्वाचन परिणामले अब हुने निर्वाचनमा पार्टीले बहुमत ल्याउने स्पष्ट चित्र कोरेको बताएका छन् ।

पार्टीको प्रचार तथा प्रकाशन विभागको २०७९ असार १६ गते बसेको बैठकमा अध्यक्ष ओलीले देशी विदेशी प्रतिक्रियावादी शक्तिहरू योजनाबद्धरूपमा एमालेविरूद्ध एक हुँदा पनि लोकप्रिय मतमा पार्टी पहिलो भएको बताए ।

उनले स्थानीय तहको निर्वाचनमा निर्वाचित सिटसंख्या केही कम आएकोमा भन्दा आफूलाई पार्टीभित्र देखिएको प्रवृत्तिले चिन्तित बनाएको बताए । अध्यक्ष ओलीले पार्टीभित्रको डरलाग्दो प्रवृत्तिको उपचार आगामी निर्वाचन अघि नै खोजिने छ भने ।

बैठकमा अध्यक्ष ओलीले स्थानीय निर्वाचनको समग्र पाटोको चर्चा गर्दै १५० पालिकाका प्रमुख पद पार्टीभित्रको अन्तर्घातका कारण गुमाउनु परेको तथ्य राखेका थिए ।

अध्यक्ष ओलीले भने– यसपटकको चुनावमा प्रशासनिक धाँधलीले सीमा नाघ्यो । प्रहरी प्रशासन यति धेरै दुरूपयोग गरियो कि २०१५ सालदेखि हालसम्मको चुनावमा यति धेरै दुरूपयोग कहिल्यै भएको थिएन ।

उनले अगाडि थपे–मतको आधारमा एमाले नै पहिलो पार्टी बनेको छ, काँग्रेस दोस्रोे । यो तथ्य जनताले नबुझुन् भनेर प्रतिक्रियावादी र गठबन्धनका मान्छेहरू एमालेलाई हरायौं भनिरहेका छन् ।

अध्यक्ष ओलीले बैठक अघि स्थानीय तह निर्वाचनमा विभागको कार्ययोजना बमोजिम प्रचारको काममा सहयोग गर्नुहुनेहरूलाई धन्यवाद पत्र प्रदान गरे ।

बैठकमा विभागद्वारा प्रस्तुत आठबुँदे कार्ययोजना पारित गरिएको छ ।

अध्यक्ष ओलीले कार्ययोजना राम्रो रहेको र प्रभावकारीरूपमा कार्यान्वयनमा लैजान निर्देशन समेत दिए ।

पार्टीका उपमहासचिव तथा विभागका प्रमुख पृथ्वीसुब्बा गुरूङको अध्यक्षतामा पार्टी कार्यालय च्यासलमा बसेको बैठकले स्थानीय तह निर्वाचन–२०७९ को समीक्षा प्रतिवेदन र विभागको कार्ययोजना पारित गरेको केन्द्रीय कमिटी सदस्य तथा प्रचार तथा प्रकाशन विभाग उपप्रमुख बिष्णु रिजालले बताए ।