काठमाडौं– प्रधानमन्त्री केपी शर्मा ओलीले राष्ट्रिय सभामा पेश गरिएको गुठीसम्बन्धी कानूनलाई एकीकरण गर्न बनेको विधेयकका सम्बन्धमा छलफल गर्न काठमाडौं उपत्यकाबाट प्रतिनिधित्व गर्ने सांसदहरुलाई छलफलका लागि बोलाएका छन् ।

विधेयकको विषयमा विरोध प्रदर्शन चर्किदै गएपछि प्रधानमन्त्रीले कमजोरी सच्याउने प्रतिवद्धता जनाइसकेका छन् ।

साताव्यापी युरोप भ्रमणबाट आइतबार स्वदेश फर्किएका ओलीले सोमबार विहानैदेखि विधेयकका विषयमा परामर्श लिन शुरु गरेका थिए । प्रधानमन्त्री ओलीले विमानस्थलमा सञ्चारकर्मीसँग कुरा गर्दै विधेयकमा भएका कमजोरी सच्याइने बताएका थिए ।

प्रधानमन्त्री ओलीले विधेयकका विवादित विषयलाई सच्याउने सन्दर्भमा कानून मन्त्रालय र प्रधानमन्त्री तथा मन्त्रीपरिषद कार्यालयको कानून महाशाखाका सचिव तथा अन्य अधिकारीसँग पनि परामर्श गरेका छन् ।

प्रधानमन्त्री ओलीले विधेयकमा समावेश भएका विषय र विरोधका क्रममा भइरहेका आन्दोलनबारे छलफल गर्न काठमाडौं उपत्यकाबाट प्रतिनिधित्व गर्ने सबै राजनीतिक दलका सांसदलाई बोलाएका हुन् ।