काठमाडौँ– फिल्म ‘राधा’ को थिम पोस्टर सार्वजनिक भएको छ । सुवर्ण थापाको निर्देशनमा तयार भएको फिल्ममा शीर्ष पात्रमा सृष्टि श्रेष्ठ छिन् । उनले आफ्नो पतिको खोजी गर्ने कथा नै फिल्म हो । सार्वजानिक पोस्टरले पनि यही तथ्यलाई चित्रण गर्छ । सृष्टि खोजीका लागि यात्रामा रहेको संकेत सार्वजनिक पोस्टरले गर्छ । 

बेपत्ता श्रीमानको खोजीको कथामा बनेको फिल्मको पहिलो पोस्टरमा बच्चा बोकेकी सृष्टिको उदास अनुहारलाई प्रस्तुत गरिएको थियो । पोस्टरबाटै कथा भन्ने प्रयास गरिरहेका सुवर्ण थापाले दोस्रो पोस्टरमा यसका लागि सृष्टि यात्रामा निस्किएको संकेत गरेका छन् । 

सुवर्ण थापाकै लेखन रहेको यो फिल्ममा सौगात मल्ल निर्माताको रुपमा समेत छन् । फिल्ममा सौगातसँगै निश्चल बस्नेत, खगेन्द्र लामिछाने, दयाहाङ राई, दिव्य देव जस्ता अन्य अभिनेता पनि छन् । आफ्नो निर्माणमा डेब्यु रहेको फिल्ममा अन्य अभिनेताले साथ दिँदा सौगात दङ्ग छन् । ‘मलाई कथा मन परेर फिल्म निर्माणमा जोडिएको हुँ । फिल्ममा काम गर्ने भनेर तयार परिएको कथामा आफू परिसकेपछि निर्माता बनेको हुँ’ सौगातले भने । 

सौगातले आफ्नो आग्रहलाई स्विकार्दै स-सानो रोलमा समेत निश्चल, खगेन्द्र र दयाले अभिनय गरिदिएकोमा खुसी छन् । उनले राम्रो कथालाई आर्थिक अभावमा कागजमै थन्किएको देख्न नसक्ने भएकाले निर्माताको रूपमा अगाडि आएको बताए । थिएटर पृष्ठभूमिकामा कलाकारको बाहुल्य रहेको फिल्ममा मेनुका प्रधान, बुद्धि तामाङ आदिको पनि अभिनय देख्न सकिन्छ ।

यसै फिल्म मार्फत निर्माता बनेका सौगातले तीन महिना अन्य फिल्मको कामबाट विश्राम लिँदै ‘राधा’ लाई समय दिने भएका छन् । आफैँ निर्माता भएकाले पनि उनी अन्य फिल्मको काम सारेर ‘राधा’ मा व्यस्त हुँदै छन् ।