काठमाडौँ– सञ्चार तथा सूचना प्रविधि मन्त्री ज्ञानेन्द्र बहादुर कार्कीले समाज परिवर्तनको लागि फिल्म कारक तत्व रहने बताएका छन् । ‘नेपाललाई आफ्नो क्षेत्रबाट सभ्य, शान्त र समृद्ध समाज बनाउँदै आउने पुस्तालाई कमसेकम १० वर्ष भित्र समृद्ध समाज र देशको पक्षमा उभ्याउन सक्षम बनाउन आवश्यक देखिन्छ । यसको लागि फिल्मको निकै ठुलो महत्व छ । म यसक्षेत्रको विकासको लागि सधैँ साथमा छु’ मन्त्री कार्कीले भने । 

उनले चलचित्र पत्रकार संघ नेपालको २३ औँ वार्षिकोत्सवको उपलक्ष्यमा आयोजित सम्मान तथा पुरस्कार वितरण समारोहमा बोल्दै फिल्मको माध्यम मार्फत समाज परिवर्तनमा भूमिका खेल्न सकिने बताए । उनले चलचित्र पत्रकारिता मोफसलमा समेत बढिरहेकोमा खुसी व्यक्त गरे । ‘विधागत पत्रकारिता गरिरहनु भएका तपाइँसम्पूर्ण अझै जागरुक हुनुपर्छ’ उनले भने । मन्त्री कार्कीले नेपाली फिल्मको विकासका लागि आफू सदैव तयार रहेको भन्दै नीतिगत रूपमै सुधारमा लागेको बताए । 

चलचित्र पत्रकार संघ नेपालले तीन वर्षकै पुरस्कार तथा सम्मान एकसाथ प्रदान गरेको थियो । दिनेश सिटौलाको अध्यक्षतामा सम्पन वार्षिक उत्सव समारोहमा २०७७, ७८ र ७९ सहित १६ पत्रकारले सम्मान, पुरस्कार , प्रोत्साहन पुरस्कार, मोफसल पत्रकारिता पुरस्कार लगायत प्रदान गरिएको थियो ।