काठमाडौँ– लेखक नयनराज पाण्डेको उपन्यास ‘लू’ फिल्म आउँदो मङ्सिरबाट फ्लोरमा जाने भएको छ । निशा खरेल निर्माता रहेको फिल्मको पटकथा पुस्तक लेखक स्वयम् नयनराज पाण्डेले लेखिरहेका छन् । क्यारो फिल्म्सले निर्माण गर्ने भनिएको ‘लू’ का गीतलाई कालीप्रसाद बाँस्कोटाले तयार गर्ने भएका छन् । निर्माण कम्पनी र कालीबीच आइतबार सहकार्यको सम्झौता भएको हो । दुई गीत रहने फिल्मका दुवै गीत कालीले तयार गर्नेछन् ।

क्यारो फिल्म्सका रोजित भट्टराईले  अहिलेसम्म फिल्मका लागि कम्पनीले कालीप्रसाद बाँस्कोटा र नयनराज पाण्डेसँग मात्र सम्झौता गरेको जनाएको छ । यद्यपि फिल्ममा अभिनेताको रुपमा विपिन कार्की र निर्देशकको रुपमा प्रदीप भट्टराईको नाम चर्चामा छ । ‘लू’ शीर्षकमा फिल्म बन्ने भएपछि पाठकहरू उत्साहित छन् ।