आज प्रकाशित कान्तिपुर दैनिकले सातै प्रदेशका सांसदलाई कुस्त बजेट शीर्षकमा समाचार प्रकाशन गरेको छ ।

समाचारमा भनिएको छ– केन्द्रको सिको गर्दै सातै प्रदेशले सांसदका तजबिजीमा खर्च गर्ने गरी बजेट विनियोजन गरेका छन् ।

सबै प्रदेशहरुले बिनियोजन गरेको विकास बजेटको करिब ९ प्रतिशत सांसदहरुको हातबाट खर्च गर्ने गरी रकम छुट्याएका छन् ।

११ अर्ब ८८ करोड ९० लाख रुपैयाँ प्रदेश सांसदहरुले खर्च गर्ने गरि बिनियोजन गरिएको छ । गत वर्ष सांसदलाई प्रदेश निर्वाचन अनुसार बजेट विनियोजन नगरेको गण्डकी प्रदेशले योपटक सांसदहरुलाई बजेट छुट्याएको छ ।

पूर्वाधार विकासलाई लागि उसले ७२ करोड रुपैयाँ विनियोजन गरेको छ । यो रकमका आधारमा एक सांसदलाई एक करोड २० लाख रुपैयाँ पर्न जान्छ । यस्तै एक नम्बर प्रदेशले प्रतिनिर्वाचन क्षेत्र २ करोड ५० लाख रुपैयाँका दरले बजेट छुट्याएको छ ।

प्रदेश २ र ३ तथा सुदूरपश्चिम प्रदेशले प्रतिसांसद ३ करोड रुपैयाँका दरले बजेट बिनियोजन गरेको छ । ५ नम्बर प्रदेशले प्रदेशसभाका सदस्याहरुको सिफारिसमा १० लाखका दरले ६ वटा योजनामा खर्च गर्नेगरि बजेट बिनियोजन गरेको छ ।