काठमाडौं– इंग्लिस क्लब चेल्सीका पूर्व प्रशिक्षक माउरिजियो सारी इटालियन सिरी ‘ए’ को च्याम्पियन युभेन्टसको प्रशिक्षकमा नियुक्त भएका छन् ।

आइतबार सारीलाई आधिकारीक रुपमा युभेन्ट्सको प्रशिक्षकमा युभेन्टसले नियुक्त गरेको अन्तर्राष्ट्रिय समाचारहरुले उल्लेख गरेको छ । सारीले युभेन्ट्ससँग ३ वर्षको सम्झौता गरेर क्लबमा आवद्ध भएका हुन् ।

नापोलीबाट जुलाई २०१८ मा चेल्सी आएका सारीले इंग्लिस क्लबलाई प्रिमियर लिगमा तेस्रो स्थानसम्म पुर्याएका थिए भने एक वर्ष इन्चार्ज भएका उनले युरोपा लिगको उपाधि जिताउन समेत महत्वपूर्ण भूमिका निभाएका थिए ।

६० वर्षीय सारीलाई प्रशिक्षक लागि दुवै क्लबले आपसी समझदारीमा हस्ताक्षर गरेको जनाइए पनि कति रकममा उनलाई आवद्ध गरिएको हो भन्ने खुलाइएको छैन ।  युभेन्ट्सका प्रशिक्षक मासिमिलियानो एलेग्रीले गएको सिजनको समाप्तिसँगै क्लब छाडेपछि सारीलाई क्लबले भित्र्याएको हो । गएको जुलाईमा विश्व चर्चित खेलाडी क्रिष्टियानो रोनाल्डो पनि युभेन्टस पुगेका थिए ।