काठमाडौँ- नुवाकोटको ककनीको हाइटेन्टसन तारमा झुन्डिएका युवकलाई नेपाली सेनाको टोलीले उद्धार गरेको छ ।

बिजुलीको पोलबाट तारमा चढेर हिँडिरहेका प्रेमबहादुर बिक ‘माइला’ लाई करिब ९ घण्टापछि उनको उद्धार गरिएको हो ।उनलाई सेनाको टोलीले उद्धार गरेको नेपाली सेनाका प्रवक्ता नारायण सिलवालले जानकारी दिए।

उनलाई तल झार्नको लागि प्रहरी तथा स्थानीयले प्रयास गरिरहे पनि उनी भने अटेरी गरेर बसिरहेका थिए। हाइटेन्सन तारमा हिँडिरहेका व्यक्तिको उद्धारका लागि ऊर्जा, जलस्रोत तथा सिंचाइ मन्त्री पम्फा भुसालले नेपाली सेनालाई आग्रह गरेकी थिइन् ।

बिजुलीको तारबाट झर्न नमानेपछि ६० मेगावाटको माथिल्लो त्रिशूली–३ ए आयोजनामा विद्युत उत्पादन नै केही समयको लागि बन्द भएको थियो। करेन्ट लाग्न सक्ने भएपछि विद्युत् उत्पादन बन्द गरिएको प्राधिकरणले बताएको छ।

बिहान १० बजे उनी बिजुलीको पोलबाट तारमा चढेका थिए ।