काठमाडौँ- चिनियाँ कम्पनीहरुले बंगलनादेशमा कर छली गरेको पाइएको छ । बंगलादेशका अधिकारीले बंगलादेशमा सञ्चालित चाइना रोड एण्ड ब्रिज कर्पोरेशन नामक चिनियाँ कम्पनी गत वर्षको डिसेम्बर महिनामा कर छलीमा संलग्न रहेको फेला पारेको बंगलादेश लाइभ न्युज नामक अनलाइन समाचार पोर्टलले जनाएको छ ।

यो कम्पनीले सरकारी परियोजनाका लागि निर्माण सामग्री आयात गर्दा कर छली गरेको जनाइएको छ । चिनियाँ कम्पनीले कर छली गरेको पत्ता लागेपछि बंगलादेशी अधिकारीले चीन सरकारलाई तीन पूर्वाधार परियोजनाबाट पछि हट्न बाध्य पारेको भारतीय समाचार संस्था एएनआईले जनाएको छ ।

यस प्रकरणमा चिनियाँ कम्पनीले ढाका चटगाउँ रेल परियोजनाको निर्माण कार्यका लागि अरु १६ वटा चिनियाँ कम्पनीलाई विभिन्न किसिमका टेण्डर दिएर पछि ती कम्पनीहरु आफ्नै कम्पनीको हिस्सा रहेको दाबी गरी कर छली गरेको जनाइएको छ ।

यसअघि मे महिनामा पनि सिनो केमेड ट्रेडिङ नामक अर्को चिनियाँ कम्पनी कर छलीमा संलग्न रहेको पाइएको थियो ।