काठमाडौँ- पछिल्लो २४ घण्टामा पाकिस्तानको पञ्जाब प्रान्तमा अलग अलग स्थानमा भएका गोली प्रहारमा परेर कम्तीमा पनि नौ जनाको ज्यान गएको छ । गएको २४ घन्टा यता भएका ती हमलाहरुमा नौ जनाको हत्या भएको प्रहरीले जनाएको छ ।

अज्ञात समूहले त्यहाँका विभिन्न स्थानमा अन्धाधुन्ध गोली हानेको प्रहरीले जनाएको हो । पञ्जाब प्रान्तको शिखुपुरा जिल्लामा गोली हानेर चार जनाको हत्या गरिएको जनाइएको छ ।

सो आक्रमणमा आक्रमणकारीले सवारी साधनमा गोली हानेर चार जना यात्रुको हत्या गरिएको प्रहरीले जनाएको छ ।

बीच सडकमै चार जनाको हत्या गरेको सो अज्ञात व्यक्ति भाग्न सफल भएको प्रहरीले जनाएको छ । प्रहरीले खोजी अभियानलाई जारी राखेको भए पनि हालसम्म पक्राउ गर्न सकेको छैन ।

त्यसैगरी पञ्जाब राज्यको भवलपुर जिल्लामा पनि भ्यानमा यात्रा गरिरहेका यात्रुमाथि गोली चलाइएको थियो । त्यसमा परेर पाँच जना मारिएका थिए । यसमा संलग्न बन्दुकधारी पनि फरार रहेको र प्रहरीले खोजी जारी राखेको बताएको छ ।

सडकमा गुडिरहेको भ्यानमा एक अज्ञात व्यक्तिले गोली हानेर भागेको थियो ।