काठमाडौँ– चलचित्र पत्रकार संघकी सदस्य रीना मोक्तानले पाँच वर्ष अगाडि आफूमाथि यौन दुर्व्यवहार गर्ने व्यक्ति हाल चलचित्र पत्रकार संघको पदाधिकारी रहेको भन्दै सामाजिक सञ्जालमा उल्लेख गरेपछि यस विषयमा संघको ध्यानाकर्षण भएको छ । संघका अध्यक्ष दिनेश सिटौलाले एक विज्ञप्ति जारी गर्दै संघ आफ्ना सदस्यहरू तथा जोकोहीमाथि हुने सबै प्रकारका दुर्व्यवहार तथा हिंसाको विरुद्धमा सदैव दृढतापूर्वक उभिँदै आएको बताएका छन् ।

आफ्नो सदस्य माथि पदाधिकारीद्वारा नै यौन दुर्व्यवहार भएको जानकारी पाएपछि बसेको आकस्मिक बैठकले सदस्य मोक्तानसँग आधिकारिक रुपमा जानकारी लिन र छानबिन गर्न समिति समेत गठन गरेको छ । संघकी कार्यसमिति सदस्य सुरक्षा भट्टराईको संयोजकत्वमा श्रृष्टी पोखरेल, गोपीकृष्ण चापागाईँ, अञ्जना दाहाल र आशिष ओली सदस्य रहेको गठित समितिले छानविन गरेर बुझाउने प्रतिवेदनको आधारमा संघले निर्णय लिने अध्यक्ष सिटौलाले बताए । उनले संघले आफ्नो सदस्यहरूको हकहितका लागि सदैव साथ रहेको समेत बताए ।