काठमडौं– अमेरिकाले भारतमा दुई बोइङ एफ/ए– १८ ई सुपर होर्नेट लडाकु विमान पठाएको छ ।

लड्न सक्ने क्षमता प्रदर्शन गर्न अमेरिकाले भारतमा दुई लडाकु विमान पठाएको भारतीय समाचार संस्था प्रेस ट्रष्ट अफ इण्डिया पीटीआईले जनाएको छ । ती लडाकु विमान भारतको गोवा राज्यमा रहेको नौसैनिक अखडा पुगेको पीटीआईले जनाएको छ ।

भारतीय नौसेनाले भारतमै निर्मित विक्रान्त लडाकु विमानवाहक युद्धपोतका लागि लडाकु विमान खरिद गर्ने योजना बनाइरहेका बेला अमेरिकी लडाकु विमानलाई भारतीय नौसैनिक क्षेत्रमा पठाइएको हो ।

यसअघि गत जनवरी महिनामा भारतीय नौसेनाले रफायल लडाकु विमानको लड्न सक्ने क्षमता प्रदर्शन गर्नका लागि अभ्यास गरेको पीटीआईले जनाएको छ ।

भारतीय नौसेनाको लडाकु विमानवाहक युद्धपोत विक्रान्त यही अगस्ट महिनाबाट नौसैनिक सेवामा प्रवेश गर्ने अपेक्षा गरिएको छ ।