काठमाडौँ- नेपालमा कारगारमा रहेका बन्दीहरुको सशक्तीकरणका लागि फुटबल कार्यक्रम सार्वजनिक गरिएको छ ।

नेपालले एसियाली फुटबल महासंघ र अखिल नेपाल फुटबल संघ एन्फाको समन्वयमा सेल्टर आश्रय नामक गैर सरकारी संस्थाले फुटबल कार्यक्रमको आयोजना गर्न लागेको हो ।

फुटबलका माध्यमबाट समाजमा कैदीहरुको पुनस्र्थापना कार्यक्रमअन्तर्गत कारगार फुटबल आयोजना गर्न लागिएको जनाइएको छ । ललितपुरको सातदोबाटोस्थित एन्फा कम्प्लेक्समा आयोजित पत्रकार सम्मेलनमा एन्फाका महासचिव इन्द्रमान तुलाधार र शेल्टर आश्रयाका अध्यक्ष खुश्बु ओलीले सम्झौतामा हस्ताक्षर गरेका हुन् ।

सो कार्यक्रममा फुटबलमार्फत कैदीको क्षमता निर्माण गर्ने लक्ष्य रहेको ओलीले जानकारी दिए । कैदीहरुमा खेलाडी, रेफ्री र प्रशिक्षक शिक्षा कार्यक्रममार्फत आत्मविश्वास वृद्धि गर्दै पछिल्लो गैरकानुनी जीवनमा फर्कानबाट रोक्न लक्ष्य रहेको जनाइएको छ ।

यसले मानसिक स्वास्थ्य र समाजिक सुधारको लागि काम गर्ने इच्छाको विकास गर्ने अपेक्षा गरिएको छ ।

यस कार्यक्रमले एक वर्षमा ४८ खेलाडी, ३२ रेफ्री तथा ३२ प्रशिक्षकलाई तालिम दिने योजना रहेको छ । कार्यक्रमको पहिलो चरण जुन ५ देखि नेभेम्बर ३० सम्म सञ्चालन हुनेछ ।

यस चरणमा २४ खेलाडी, १६ रेफ्री तथा १६ प्रशिक्षकलाई तालिम प्रदान गरिनेछ । दोस्रो चरण भने सन् २०२३ को डिसेम्बर १ देखि मेसम्म सञ्चालन हुनेछ । तालिमको अन्त्यमा प्रशिक्षकले डी लाईसेन्स, रेफ्रीले क्याटेगोरी आईभी सर्टिफिकेट र खेलाडीले सहभागी भएको प्रमाण पत्र प्राप्त गर्नेछन् ।