काठमाडौँ– कांग्रेस नेता मिनेन्द्र रिजालले सरकारले ल्याएको आगामी आर्थिक वर्षको बजेट समायानुकुल रहेको बताएका छन् । 

प्रतिनिधिसभाको मंगलबार बसेको बैठकमा  आर्थिक वर्ष २०७९/०८० को राजश्व र व्ययको वार्षिक अनुमानमाथि सामान्य छलफलमा सहभागी हुँदै उनले बजेटमा समेटिएका कार्यक्रम र रकम विनियोजनप्रति समर्थन जनाए । आफूभन्दा अगाडि बोलेका एमाले नेता तथा पूर्वअर्थमन्त्री विष्णु पौडेललाई जवाफ दिँदै रिजालले भने, ‘संसद् छलेर तपाईँले ल्याउनु भएको बजेट एक पटक हेर्नुहोस् । अहिले भन्नुभएको अघिल्लो वर्ष तपाईँले ल्याएको बजेटमा समेट्नु भएको भए हुन्थ्यो नि ।’ 

सामाजिक सुरक्षाभत्ता पाँच हजार नपुर्‍याएकोमा पौडेलको असन्तुष्टिप्रति रिजालले भने, ‘तपाईँको पार्टीको घोषणापत्रको कार्यक्रम यो सरकारले किन लागू गर्ने ?भूमिका फेरिएसँगै विचार फेर्ने प्रवृत्ति नेताहरूले त्याग्नुपर्ने बताउँदै उनले अघिल्लो वर्ष एमाले सरकारले ल्याएको बजेट पनि चुनाव लक्षित नै रहेको स्मरण गराए ।