एजेन्सी–उत्तर प्रदेश र उत्तराखण्डमा विशाक्त मदिराका कारण ज्यान गुमाउनेका सङ्ख्या बढ्दै जाँदा भारतीय काँग्रेस पार्टीकी महासचिव प्रयंका गान्धीले त्यहाँका भारतीय जनता पार्टी बीजेपी नेतृत्वको सरकारले अवैध मदिरा उद्योगलाई प्रोत्साहन गरेको आरोप लगाएकी छिन् ।

‘‘उत्तर प्रदेश र उत्तराखण्डमा विशाक्त मदिरा सेवनका कारण एक सय जनाभन्दा धेरैको ज्यान गएको घटनाप्रति म दुःखित छु । ती राज्यमा बीजेपी सरकारको सहयोगबिना अवैध मदिरा उद्योग सञ्चालन हुनै सक्दैनन् ।’’ गान्धीले विज्ञप्ति जारी गर्दै भनेकी छिन् ।

उनले त्यहाँका बीजेपी सरकारले अवैध मदिरा उद्योगमाथि कडा कारवाहीका लागि समेत आह्वान गरेकी छिन् । काँग्रेसले पूर्वी उत्तर प्रदेशको नेतृत्व गर्नेगरी महासचिव बनाएपछि अवैध मदिरा उद्योगका विषयमा गान्धीको यस्तो भनाइ आएको हो ।

उत्तराखण्डको बालुपुर गाउँमा एक अन्त्येष्टि कार्यक्रमपछि मानिसहरुले अवैध मदिरा पिउँदा हालसम्म कम्तीमा ९७ जनाको ज्यान गइसकेको छ भने प्रहरीले अवैध मदिरा उद्योग सञ्चालक तथा कारोबारी गरी २ सय जनाभन्दा धेरैलाई पक्राउ गरिसकेको छ ।