काठमाडौं- यातायात व्यवस्था विभागले तत्काल सार्वजनिक सवारी साधानको भाडा वृद्धि नहुने बताएको छ । सार्वजनिक यातायातको भाडा बढाएको पाँच घन्टा नबित्दै निर्णय फिर्ता लिइएको हो ।

निर्णय फिर्तासँगै विभागले असार १ गतेदेखि लागू गर्ने भनेको काठमाडौं उपत्यकाको रिङ रोडभित्र मालबाहक सवारीमा रोक, काठमाडौं उपत्यकामा रात्रिकालिन बस सेवा र सार्वजनिक यातायात तथा मालबाहक सवारी साधनमा तोकिएको नयाँ भाडादर तत्काल लागू नहुने भएको हो।

विभागले बिहीबार दिउँसो १२ प्रतिशतसम्म भाडा वद्धि गर्ने निर्णय गरेको थियो । भाडा वृद्धिको निर्णयसँगै देशभरको नयाँ भाडादर समेत सार्वजनिक गरेको विभागले वैज्ञानिक भाडा समायोजन गर्न भन्दै निर्णय स्थगन गरिएको छ । यातायात व्यवस्था विभागका निर्देश प्रेमनाथ सिंहले थप छलफल गर्नु पर्ने भएकाले हाललाई स्थगन गरिएको जानकारी दिए ।

विभागस्रोतका अनुसार भाडा बढाउने निर्णय भए लगतै प्रधानमन्त्री कार्यालयले चासो देखाएको थियो । बजेट पारित नहुँदै भाडा बढाउँदा सरकारको तीव्र आलोचना हुने भन्दै निर्णय फिर्ता लिन दबाब आएपछि स्थगन गरिएको स्रोतको दाबी छ ।