काठमाडौं – नेपाल प्रिमियर लिग (एनपीएल) अन्तर्गत त्रिवि क्रिकेट मैदान कीर्तिपुरमा भएका ३२ वटा खेल हेर्न एक लाख ३० हजारभन्दा बढी दर्शक पुगेका आकलन गरिएको छ ।

उद्‌घाटनदेखि फाइनल खेल हेर्न काठमाडौं उपत्यका र बाहिरी जिल्लाबाट उक्त संख्यामा दर्शक कीर्तिपुर मैदान पुगेको अनुमान क्रिकेट एसोसिएन अफ नेपाल (क्यान) ले गरेको हो ।

क्यानका प्रवक्ता छुम्बी लामाले खबरहबसँग भने, ‘अन्तिम डाटा संकलन भइसकेको छैन, तर करिब एक लाख ३०–३५ हजार दर्शकले कीर्तिपुर नै पुगेर खेल हेर्नुभएको हाम्रो प्रारम्भिक निष्कर्ष छ ।’

लामाका अनुसार, त्रिवि मैदानमा क्रिकेट हेर्न मोफसलबाट ६० हजारभन्दा बढी दर्शक आइपुगेका थिए । उनले भने, ‘जनकपुर, सुदूरपश्चिम भनौं वा आठै फ्रेन्चाइजका सम्बन्धित भूगोलका दर्शक आएर कीर्तिपुरमै खेल हेर्नुभएको छ । आफूले समर्थन गरेको टिमको खेल हेर्न बाहिरबाट दर्शक आउनु भएको हो ।’

क्यानको अपेक्षाअनुसार नै घरेलु लिगका खेल हेर्न दर्शक आएका लामाले बताए । उनले थपे, ‘अपेक्षाभन्दा राम्रो उपस्थिति पायौं । दर्शकको उपस्थितिले एनपीएलमा सहभागी विदेशी खेलाडी मोहित भएको हामीले पाएका छौं ।’