वाशिंटन डीसी– अमेरिकी राष्ट्रपति डोनाल्ड ट्रम्पले सन् २०२० को राष्ट्रपतीय निर्वाचन अभियानका क्रममा विदेशीसँग आफ्ना प्रतिद्वन्द्वीलाई हानी पुर्‍याउने सूचना भए आफूले सहर्ष स्वीकार्ने टिप्पणी गरेका छन् ।

एबीसी टेलिभिजनलाई दिएको अन्तरवार्ताका क्रममा राष्ट्रपति ट्रम्पले यस्तो टिप्पणी गरेका हुन् । सन् २०१६ मा भएको राष्ट्रपतीय निर्वाचन अभियानका क्रममा विदेशी मुलुकबाट आएको भनिएको सूचनाबारे उनका छोरा डोनाल्ड ट्रम्प जुनियरले अमेरिकी संघीय जाँचबुझ व्यूरो एफबीआईलाई जानकारी दिनुपथ्र्यो कि पर्दैनथ्यो भन्ने प्रश्नमा उनले भने ‘हेर्नोस्, व्यवहारिक जीवन यसरी चल्दैन ।’

उनले भने– ‘यदि तपाईं सुन्न चाहनुहुन्छ भने तपाईं त्यसो गर्न सक्नुहुन्छ । यस्तो कुरा सुन्दा केही बिग्रिँदैन’, ‘यदि कसैले मलाई कुनै मुलुकबाट सम्पर्क गरी मेरा प्रतिद्वन्द्वीलाई हानी गर्ने कुनै सूचना छ भन्छ भने सायद म त्यस्तो सूचना सुन्न चाहन्छु’ उनले भने ।

पछि उनले यस्तो जानकारी पाए ‘सायद एफबीआईलाई सम्पर्क गर्ने’ प्रतिक्रिया दिएका थिए । अन्तरवार्तामा उनले २०१६ को निर्वाचनमा विदेशी शक्तिले हस्तक्षेप गरेको भन्ने आरोपको पनि खण्डन गरे । अमेरिकी निर्वाचनमा रुसले हस्तक्षेप गरेको विषयले ट्रम्पको राष्ट्रपतीय कार्यकाललाई प्रभावित बनाइरहेका बेला ट्रम्पको पछिल्लो टिप्पणी आएको हो ।