काठमाडौं – आईसीसी विश्वकप क्रिकेट अन्तरगत भारत र न्युजिल्यान्डविरुद्धको खेल वर्षाका कारण प्रभावित भएको छ ।

इङ्ग्ल्यान्ढको नोटिङघामस्थित ट्रन्ट ब्रिजमा हुने खेल मैदान भिजेका कारण टस हुन सकेको छैन ।

विश्वकपमा अघिल्ला २ खेल लगातार जित्दै लय समात्न सफल भारतका लागि न्युजिल्यान्डविरुद्धको खेल महत्वपूर्ण रुपमा हेरिएको छ । यद्यपी न्युजिल्यान्ड पनि विश्वकपमा लगातार ३ खेल जित्दै उच्च फर्ममा रहेको छ । विश्वकपको शीर्ष स्थानमा रहेको न्युजिल्यान्ड भारतलाई रोक्ने लक्ष्यमा रहेको छ ।

म्याच अम्पायरका अनुसार पीच खेल्न योग्य भएपनि मैदानको केही भाग भिजेको र मौसम अझै सफा भइनसक्दा खेलको टस हुन सकेको छैन् ।

विश्वकपमा यसअघि पनि पाकिस्तान र श्रीलंका, बंगलादेश र श्रीलंकाबीचको खेल बर्षाकै कारण शुरु हुन सकेको थिएन ।