काठमाडौं– युरोपेली मुलुकहरुको भ्रमणमा रहेका प्रधानमन्त्री केपी शर्मा ओली फ्रान्सको राजधानी पेरिस पुगेका छन् ।

संयुक्त अधिराज्य (बेलायत)को औपचारिक भ्रमण सकेका प्रधानमन्त्री ३ दिने भ्रमणका लागि फ्रान्सको राजधानी पेरिस पुगेका हुन् ।

बेलायतबाट रेल यात्रामार्फत पेरिसको गेर दु नोर्द स्टेसन आइपुग्दा प्रधानमन्त्री ओलीलाई फ्रान्सका लागि नेपाली राजदूत दीपक अधिकारी, फ्रान्सेली शिष्टाचार अधिकृत फ्राँस्वा जेभियर लेजर तथा पेरिसस्थित नेपाली राजदूतावासका अधिकारीले स्वागत गरे ।

प्रधानमन्त्री ओलीका साथमा उनकी धर्मपत्नी राधिका शाक्य, परराष्ट्रमन्त्री प्रदीपकुमार ज्ञवाली तथा प्रधानमन्त्रीका सल्लाहकार तथा नेपाल सरकारका उच्चपदस्थ अधिकारी पनि पेरिस पुगेका छन् ।

प्रधानमन्त्री ओलीले बिहीबार फ्रान्सेली राष्ट्रिय उद्योग वाणिज्य महासङ्घले आफ्नो मुख्यालयमा आयोजना गरेको एक कार्यक्रमलाई सम्बोधन पनि गरे । कार्यक्रममा फ्रान्सेली व्यावसायिक समुदायका प्रतिनिधिले भाग लिएका थिए ।

प्रधानमन्त्री ओलीले फ्रान्सका केही कम्पनीका प्रतिनिधिसँग पनि छुट्टै भेट गरेका पेरिसस्थित नेपाली दूतावासले जारी गरेको विज्ञप्तिमा उल्लेख छ ।

दुवै अवसरमा प्रधानमन्त्री ओलीले नेपालमा उपलब्ध लगानीको अवसरका विषयमा जानकारी दिँदै फ्रान्सेली कम्पनीलाई लगानीका लागि आग्रह गरे ।

बुधबार साँझ प्रधानमन्त्री ओली राजदूत अधिकारीले आयोजना गरेको स्वागत समारोहमा सरिस भएका थिए ।