नयाँ दिल्ली– भारतीय प्रधानमन्त्री नरेन्द्र मोदीले किर्गिजस्तानको राजधानी विस्खेकमा हुने साङ्घाई सहयोग संगठनको सम्मेलनमा सहभागी हुन जाँदा पाकिस्तानी आकाशको प्रयोग नगर्ने भएका छन् ।

भारतको परराष्ट्र मामिला मन्त्रालयलाई उद्धृत गर्दै भारतीय सञ्चारमाध्यमले जनाएअनुसार विस्खेकको भ्रमणमा जानका लागि हवाईमार्गका दुई विकल्पबारे चर्चा भएको थियो । पछि भने ओमन, इरान र मध्य एशियाली मुलुकहरुबाट मोदीको विमान लगिने निर्णय लिइएको छ । साङ्घाई सहयोग संगठनको सम्मेलन यसैसाता विस्खेकमा हुँदैछ ।

यसअघि पाकिस्तानले मोदीको विमानलाई आफ्नो आकाश प्रयोग गर्न दिने जनाएको थियो ।

गत फेब्रुअरीमा दुई मुलुकबीचको सम्बन्धमा दरार उत्पन्न भएपछि पाकिस्तानले भारतीय विमानलाई आफ्नो आकाश प्रयोग गर्न दिएको छैन ।