काठमाडौं– राष्ट्रिय जनता पार्टी (राजपा) नेपालका नेता तथा सांसद अनिल कुमार झाले संवैधानिक अंगबाटै समावेशी सिद्धान्त खत्तम गर्ने काम भइरहेको आरोप लगाएका छन् ।

स्थानीय सेवाका कर्मचारी भर्नाका लागि लोक सेवा आयोगले आह्वान गरेको विज्ञापनप्रति लक्षित गर्दै झाले योजनाबद्ध रुपमा समावेशी सिद्धान्तलाई खत्तम गर्ने काम भइरहेको आरोप लगाए ।

लोक सेवा आयोगले समावेशी सिद्धान्त र संविधानको भावना विपरित विज्ञापन आह्वान गरेकोमा सच्याउनुपर्ने झाको भनाइ छ ।

बुधबार संसद बैठकमा बोल्दै झाले अहिले ठूलो संख्यामा युवाहरु आयोगको परीक्षाका लागि तयारी गरिरहे पनि उनीहरुले आन्दोलनमा उत्रिनुपर्ने स्थिति सिर्जना गरिएको भन्दै आपत्ति जनाए ।

विज्ञापनमा मानवीय त्रुटि भए त्यसलाई सच्याएर अगाडि बढ्नुपर्नेमा सरकार भने दूधे बालकको जस्तो हटमा कायम रहेको झाले टिप्पणी गरे ।

संसदीय समिति (मिनी पार्लियामेन्ट)ले विज्ञापनलाई रोकेर सच्याउन भने पनि सरकार भने अहिलेकै विज्ञापनलाई जसरी पनि अगाडि बढाउने भनेर लागिपरेको झाको भनाइ छ ।