उदयपुर– जंगलमा घाँस काटेर आउने क्रममा बाटोमा करेन्ट लागेर एक महिलाको ज्यान गएको छ ।

उदयपुरको कटारी नगरपालिका वडा नम्बर ८ मा ११ हजार भोल्टको करेन्ट लागेर उनको घटनास्थलमै जलेर ज्यान गएको हो । घाँस काटेर आउँदै गर्दा कटारी नगरपालिका–८ टोड्केपानी चौधकिलो खरबारीमा ६९ वर्षीय गंगामाया खत्रीको ज्यान गएको हो ।

घाँस बोकेर आउँदै गर्दा बाटोमा रहेको फलामको पोेलमा छुन पुग्दा ११ हजार भोल्टको करेन्ट लागेर महिलाको कम्मरमुनी र टाउको जलेर खरानी भएको हो । उकालो बाटोमा हिंड्ने क्रममा बाटोको नजिकै रहेको पोलमा करेन्ट लागेको हो । हावा हुरीले तार झरेर पोलमा करेन्ट लागेको हुन सक्ने पूर्ववडाध्यक्ष कमलश्रेष्ठले जानकारी दिए । ईलाका प्रहरी कार्यालय कटारीका प्रमुख डीएसपी मानबहादुर राईले अनुसन्धान सुरु गरेको जानकारी दिए ।

पूर्ववडाध्यक्ष श्रेष्ठका अनुसार स्थानीयले विद्युत प्राधिकरणको प्रमुख आएर प्रतिबद्धता जनाएपछि मात्रै शव उठाउने भन्दै शव उठाएका छैनन् । नेपाल विद्युत प्राधिकरण कटारी शाखाका प्रमुख सन्तोष कार्कीले मृतकका परिवारलाई ५ लाख क्षतिपूर्ति दिने व्यवस्था रहेको जानकारी दिए ।