अछाम– भूस्वर्गका रुपमा चिनिने खप्तड पुग्न नयाँ पदमार्ग निर्माण भएको छ । अछामका स्थानीयले ३ घण्टामै खप्तड पग्ने गरी नयाँ पदमार्ग निर्माण गरेका हुन् ।

अब अछामको बाटो भएर खप्तड जाने पर्यटक तथा तीर्थालुले ३ घण्टामात्रै पैदल हिँड्नुपर्ने छ । यसअघि अछामको बाटो खप्तड पुग्न ८ देखि १० घण्टासम्म लाग्ने गर्दथ्यो ।

अछामको साँफेबगर नगरपालिकाको वडा नं १२ उनिसैनबाट ३ घण्टामै खप्तड पुग्ने गरी पदमार्ग निर्माण गरिएको हो ।

साँफेबगर नगरपालिकाको १० लाख आर्थिक सहयोगमा तथा स्थानीयवासीको सक्रियतामा पैदलयात्रामा सहजताका लागि बाटो निर्माण गरिएको बताइएको छ । उनिसैनदेखि गणेश मन्दिरसम्मको पदमार्ग निर्माण भएसँगै अछामबाट खप्तड जानेका लागि यात्रा छोटिएको छ । उनिसैनदेखि गणेश मन्दिरसम्मको पैदलमार्ग निर्माण भएसँगै अछामबाट जाने अन्य सबै रुटभन्दा छिटो खप्तड पुगिने स्थानीय हर्क रावलले बताए ।

यस्तै नगरबाटै रु पाँच लाखको सहयोगमा वडा नं १२ स्थित खप्तडको उनिसैनमा घरबास पनि सञ्चालनमा ल्याइएको छ । अब साँफेबगर हुँदै खप्तडको उनिसैन पुगेर घरबासको आनन्द लिई २ घण्टामै खप्तड पुगेर रमाउन सकिने साँफेबगर नगर कार्यपालिका सदस्य शङ्कर भुलले बताए ।